IKAW, Kilala na nga ba kita?

Nakilala kita sa simpleng Hi at Hello lang,

Na nauwi sa hindi inaaasahang pagkaka-ibigan.

Araw-araw nagkakasama hanggang sa mag-uwian,

Hindi natin namalayan na lumalim na ang samahan.

Kasama mo sa lahat ng kalokohan,

Tawanan, iyakan sampalan at kurutan.

Wala na yatang ibang mapapagsabihan,

Ng mga sikretong sayo lang ipinagkatiwalang ilaan.

Di nagtagal lumalim ang koneksyon,

Mula sa pagkakaibigan, nabuo ang mas malalim na relasyon.

Ipinakilala sa magulang, tiyahin at tiyo,

Buong tiwalang binabanggit ang pangalan mo.

Sa tuwina ay nariyan ka, magkasama nating tinatapos ang umaga.

Sa bawat problema ay karamay ka, kinakaharap natin ito ng magkasama.

Wala na yatang mas hihigit pa sa ligayang nararamdaman,

Alam kong alam mong isa ka sa mga taong aking pinaka-iingatan.

Nagdaan ang mga taon, buwan, araw at minuto,

Tila tayo’y nagkakasawaan, araw-araw nalang ganito.

Tamis ng pagmamahalan unti-unting naglaho,

Di natin napansing nasisira na pati ang mga pangako.

Hanggang sa tayo’y nagdesisyon, na tapusin ang binubuong pundasyon.

Mahirap man para sa mga puso, kayang labanan ng mga isip natin ito.

Wala mang sinisisi sa mga kaganapang nakapandurugo,

Naniniwalang babalik ka, kung sa isa’t-isa ay nakalaan ang puso.

Patawad kung nasaktan ko ang damdamin mo,

Hindi lang naman ikaw, nasaktan din ang aking puso.

Salamat sa relasyon at tiwalang nabuo,

Mga ala-ala at karanasang hindi kailanman maglalaho.

Huwag natin sayangin mga buwan at taong binilang natin.

Kahit na alam kong hindi ito madaling kamtin.

Oras, araw, matagal na panahon ang aabutin,

Ibalik ang samahan, ang natitirang pagkakaibigan natin.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Paumanhin kung hindi gaanong kagandahan ang aking tula.

Social Penetration Theory. Isang teoryang pang-komunikasyon na nagpapaliwanag na habang tumatagal ang isang relasyon, lumalalim na rin ang samahang nabubuo sa loob nito at nagsisimula nang ibahagi ng bawat partido ang kanilang sarili partikular na ang kanilang mga sikreto, dahil pinagkakatiwalaan nila ang isang tao. Ayon din sa teoryang ito, maari ding umabot sa hiwalayan ang isang relasyon sa oras na maramdaman nila na ito na ang kahahantungan ng mga susunod na pangyayari. (Altman and Taylor, 1973)

Lubos akong sumasang-ayon sa isinasaad ng teoryang ito. Ang dahilan ng pagkakaroon ng matibay na relasyon ay ang mga karanasan na napag-daraanan ng dalawang taong bumubuo nito. Dito, lubos na nilang nakikilala ang isa’t-isa, ang mga kilos o gawi, ang mga magiging reaksyon at maging ang mismong mararamdaman ng kanilang kapareho. Habang tumatagal ang isang pagsasama ay lalong lumalalim ang kanilang pagkaka-kilala sa isa’t-isa, dahilan upang tanggapin at lalong mahalin nila ang kanilang karelasyon.

Naniniwala akong may mga taong kagaya ko, na naranasan na rin ang pinaka-huling lebel ng teoryang ito. Ang tinatawag na “Depenetration”, na hiwalayan na lamang ang tanging solusyon upang hindi na patuloy pang masaktan ang kanilang mga puso. Masakit mang isipin, mahirap man itong tanggapin ay wala ng magagawa kundi tapusin ang kanilang mga nakasanayang gawin. Ngunit kung talagang pinahahalagahan ng dalawang tao ang kanilang relasyon ay hindi nila agad ito hahayaang maglaho, dahil hindi rin ganoon kadali ang limutin at tapusin na lamang isang pundasyon na binuo nila ng buong puso sa loob ng matagal na panahon. Isa ring punto ay dahil sa pumasok ka sa relasyong iyon na kilala mo ang taong iyong makakasama, kaya maaaring hindi dahilan ang hiwalayan dahil kung talagang kilala mo na ang taong iyon, matatanggap mo kung ano man ang kanyang nagawa o pag-u-ugaling mayroon siya.

Sa aking pagkakaintindi, naniniwala rin ako na hindi lang para sa nag-iibigan ang pinatutukuyan ng teoryang ito. Dahil hindi naman mag-sing-irog ang pinakamataas na lebel ng pagkakakilanlan (Valila's comment, 2013). Maaari rin itong maranasan ng dalawang tao na kapatid ang turing sa isa’t-isa at maari rin sa miyembro ng isang pamilya, depende sa kung paano nila pinaki-kilala ang kanilang sarili at kung paano ito sinusuklian pabalik sa kanila.

Sources:

 Altman, I., & Taylor, D., (1973). Social Penetration: The Development of Interpersonal Relationships. NewYork: Holt, Rinehart and Winston

Kruspkaya Valila's comment, http://sportsmikee.blogspot.com/2013/12/hanggang-kailan.html